Reû come ine bèye, si vèdje è s’ min,
I pèhe, mins ’nnè rîrè bèrwète,
Ou tot-a hipe avou ’ne åblète :
On lî d’vreût dîre dè rim’ni d’min ! 

I s’ tint la dispôy å matin :
Troûv’reût-on bin ’ne bièsse pus hayète ? 
Reû come ine bèye, si vèdje è s’ min,
I pèhe, mins ’nnè rîrè bèrwète… 

Li pèhon, c’èst bin trop malin !
A s’ viér i n’ bètch’rè nin ’ne miyète.
Noste ome lî pout fé dès clignètes :
I d’meûr’rè la, èt n’ hap’rè rin,
Reû come ine bèye, si vèdje è s’ min.