C’ èsteût l’ fièsse dèl porotche
Èt m’ mame m’ aveût payî
Li bê balon tot rodje
Qui dj’ aveû-st-inviyî.

Vos-alez mutwèt dîre
Qu’on balon ç’ n’ èst wê d’ tchwè,
Èt portant dj’ èsteû fîr
Èt pus-ureûs qu’ on rwè.

Dj’ agripéve li ficèle
Avou mès deûs r’ployîs,
L’ åreût falou èsse fèl
Po m’ èl poleûr råyî !

Insi disqu’ al vèsprêye,
Dji parådéve sins r’la…
Adon po dîre li vrèye,
Dji n’ sé çou qui m’ troûbla,

Ine måle brîhe po l’ pus sûr…
Tot d’ on côp dj’ drovia m’ min,
Sins minme m’ ènn’ aporçûre,
Èt come di djusse, rademint,

La-hôt, disqu’ ås nûlêyes
Rèvola m’ bê balon,
Po d’zeû plinnes èt valêyes,
Il-è-st-èvôye bin lon.

Å bê mitan dèl rowe,
Dji d’mana tot pèneûs :
Dj’ èsteû cwite dèl djodjowe
Qui m’ rindéve si ureûs.

Mi bê balon tot rodje,
Wice årè-t-i r’toumé ?
Å Congo ? Å Cambodje ?
Ou bin so l’ leune, qui sét ?

Èt s’ on djoû on l’ ritroûve ,
Si dot’rè-t-on, vormint,
Qu’il a mètou èn-oûve
Tant d’ djôye èt tant d’ toûrmints ?

Èt dji r’horba mès låmes
Tot tûzant qui m’balon
Enûléve on pô d’l’ åme
D’on simpe pitit Walon.