Li p’tite Louwise, èlle a ût-ans,
Vint di s’ trèbouhî so l’ pavêye
Èt s’ a stindou, la, so l’ tchåssêye
Plate come ine vôte. Tot blèmihant,
Si vèye måma so l’ côp s’ håstêye ;
Mågré sès djambes qui vont tronlant,
Èle coûrt, cåzî, divè l’èfant,
Èl rilîve, adon l’ rapåftêye …
Dès deûs, c’èst bin l’ måma qu’ a l’ hisse ;
Mins, dèl vèy al dilouhe, Louwise
Rademint hoûbe sès-oûy qui plorèt,
Èt, d’ ine vwès qu’ a mouwé sès låmes,
Tot soriant, dit-st-al vîle åme :
« Qwand dj’ årê voste adje, dji v’s-êd’rè. »