Tot cwitant Rôlêwe èt passant po li p’tite Bètche, nos arivans-t-a l’ pwète Grumzèl : la, so l’ soû d’ ine pitite mohone, in-ome è peûr lès brès´, bat’ li rôlemint so on k’bouyî tabeûr ; c’ è-st-èmon Con’ti, ås marionètes. // Divant di nos-î aler fé ’ne pinte di bon song´, dihans d’ abôrd kimint ciste amûs’mint dèl crapôt’rèye a k’mincî : li pére d’ a Djîle ⁽²⁾, ki tot Djus-d’-la-Moûse kinoh, fa li k’nohance dè halé Talbot ⁽³⁾, on Francès k’ aveût pris s’ djîse dispôy lontins a Lîdje, èt i toumît d’ acwérd èssonle po-z-èmantchî on tèyåte di marionètes ; // mins come divins tote handèle, i s’ troûve al vole dès cis k’ ont l’ avizance d’ ènnè fé ot’tant, on vèya, cåzî è minme moumint, Martchand è li p’tite Bètche èt Paily so l’ plèce d’ Otêye, droviért ⁽⁴⁾ ine parèye barake. // So li k’mincemint, c’ èsteût-st-èl plèce wice k’ on t’néve manèdje k’ on djowéve ; kékes horons a cwate pîs fêts foû d’ bwès d’ fahène, k’ on r’mètéve onk so l’ ôte å long dè djoû po s’ è d’haler, èstît lès bancs dès prumîres k’ on payîve deûs çans´⁽⁵⁾ èt d’mèy ; // drî cès-chal, i-gn-aveût ’ne pîce ⁽⁶⁾ po s’ aspoyî d’ssus, la on d’manéve tot dreût èt on n’ dinéve k’ ine çans´ ; adon so l’ fåssé grignî k’ on nouméve li cåvå ⁽⁷⁾, on î aléve po ’ne çans´ èt d’mèy ; // c’ èst la k’ on féve li pus d’ disdut, tot parèy k’ å partére å tèyåte, såf k’ å-d’-dizeûr dè brêre èt d’ tchawer, lès forsôlés dè cåvå si trovant d’zeû lès-ôtes, hinît so cès-chal po lès crèveûres dè måva plantchî, tot çou ki n’ lès-î dûhéve pus ; // i-gn-aveût co ’ne plèce k’ on payîve come lès prumîres, c’ èsteût so l’ lét, wice ki dès cårpês, dès vrêyes diâles rènant, fît dès coupèrous èt co traze los’trèyes, mins lès pouces, a leû toûr, èlzî fît r’payî çoula tot lès k’magnant. //