La, so l’ crèstê ki boute å mitan dès deûs vås,
fî parèy a li scrène d’ ine vîle adjèyante bièsse,
l’ åbe a crèhou, fwért èt vigreûs, dreût come in-i.
Sès cohes, come ot’tant d’ brès´, ont l’ êr d’ agridjî l’ cîr,
dismètant k’ sès rècènes, parèyes a dès mins d’ fiér,
hêyèt lès deûrès rotches po djonde li coûr dèl tére.

Dispôy kibin d’ annêyes sèreût-i bin la-d’zeûr ?
Pèrsone nèl pôreût dîre, ca, si lon k’ on s’ rapinse,
lès tåyes ènn’ ont djåsé come d’ ine vîle kinohance
ki leûs péres ont vèyou ki n’ èstît k’ dès-èfants.
Lès-iviérs l’ ont strindou, lès-ostés l’ ont broûlés,
èt l’ timpèsse èt l’ tonîre l’ ont djondou co traze fèyes,
sins måy li fé ’ne ac’seûre. Fêt-a-fêt’ ki crèhéve,
lès-ôtes-åbes s’ ont r’ssètchî come po lî fé dèl plèce,
èt, d’zos sès bassès cohes, i n’ crèh ki dès bouhons
k’ èles-avizèt voleûr warandi d’ leû fouyèdje.
Lès-oûhês l’ ricwèrèt, li monså fêt s’ niyêye
divins ’ne fotche conte si bôr èt, cwand l’ Bêté tchèrèye
påhûl’mint d’vins lès steûles èl doûce tièneûr dèl nut´,
c’ èst sor lu k’ po tchanter l’ råskignoû s’ apîcetêye.
C’ èst k’ l’ åbe èst pôr si bê ! Cwand c’ èst k’ on l’ veût, l’ iviér,
mostrer so l’ blanke nîvaye l’ èfèhèdje di sès cohes,
i v’ rapinse li tchèrpinte d’ on palå ki s’ èlîve,
èt, cwand l’ osté lî rind li spèheûr di sès foyes,
on creût, tot moussant d’zos, k’ on-z-inteûre è l’ èglîse
ènêrant d’zeû nosse tièsse sès hardèyès vôsseûres.
Ossu, n’ a-t-i pèrsone, èt çoula d’ lådje èt d’ long,
 ki nèl kinohe, ki nèl rèclame, ki n’ vis l’ ac’sègne,
pus hôt k’ lès pus hôts tiérs, si drèssant come ine toûr
dizeû lès bwès, dizeû lès tchamps, dizeû l’ payis.

C’ èst lu li rwè dès tchinnes : li tére ènn’ èst tote fîre !
Èt l’ åbe si lêt viker, påhûl’mint, sûr di s’ fwèce,
sins måy pinser k’ on djoû vinrè ki n’ a pus v’nou.

Il a conté sins s’ mêsse, l’ ome, ki, tot passant d’lé,
a vèyou d’ on côp d’ oûy çou k’ i valéve di çans´.
C’ èst fini dè vî tchinne ! Tot-z-oyant hil’ter l’ ôr,
l’ ome a roûvî s’ bêté, ki sès tåyes ont k’nohou ;
il a roûvî s’ vîyèsse, ki s’ pére a rèspècté.

Èt vola k’ å pîd d’ l’ åbe lès bwèh’lîs s’ arèstèt,
tchèrdjîs d’ aw’hiantès hèpes èt d’ pèzantès cougnèyes.
Rade, il ont gripé d’ssus po lî r’cèper sès cohes,
èt lès hèpes atakèt. Li crèstê si påhûle
si rimplih d’ on grand brut. On ôt crohî lès bwès
ki s’ frohèt tot toumant so lès bouhons spatés.
Lès-oûhês, tot foû d’ zèls, aband’nèt leû niyêye,
s’ èvolèt tot pîlant, dismètant k’ eune a eune
lès ramayes s’ abatèt djus dè bôr covrou d’ plåyes,
ki drèsse fîr’mint so l’ cîr si cwér tot mèsbrudjî.

I fåt k’ on l’ åye al tére ! C’ è-st-å toûr dès cougnèyes :
èle l’ atakèt po l’pîd. Li bwès, deûr come dè fiér,
tint bin conte lès-ac’seûres dès hagnantès-ustèyes.
Li brès´ dès-omes falih ; mins so l’ tins k’ onk si r’hape,
in-ôte riprind l’ ovrèdje. Èt, pidjote a midjote,
vola come ine grande plåye fête a l’ åbe, ki djèmih
èt fruzih a chake côp dès bleûs tèyants d’ acîr.
I n’ tint pus k’ d’ on costé. Rade, on-z-a nokî ’ne cwède
conte on strouk dimanou d’ eune di sès hôtès cohes,
èt lès-omes sètchèt d’ssus. L’ åbe clintche èt, tot vèrdjant,
si r’drèsse èt ståre al tére tos lès cis ki l’ ont moudri.
Lès bwèh’lîs s’ ètièstèt : li cwède èst co r’tinkèye
Èt, la ki l’ tchinne riplôye, on côp d’ hèpe bin mètou
lî vint racrèhe si plåye tot lî r’hapant dèl fwèce.

On dièrin côp d’ gorê, lès-omes è sèront mêsses !
Ossu, vola k’ èl keûhisté dèl matinêye,
on-z-ôt wîgnî ’ne sacwè, londjinn’mint, come ine plinte.
Li tchinne s’ abat’ d’ ine pèce, li crèstê rèsdondih
èt l’ tére tronle, dismètant k’ on groûlèdje di tonîre
si stårant d’zeû lès bwès, va mori d’vins lès vås.
Èt so l’ campagne, li laboureû, pris come d’ ine hisse,
arèstêye sès deûs dj’vås po loukî vès lès tiérs …

Èl plèce di l’ adjèyant, c’ èst come on trô so l’ cîr …

L’ ome a compris, ratake si rôye èt, mågré lu,
ritape a tot côp bon sès-oûy, la, vè l’ crèstê :
c’ èst ki r’sint d’vintrinn’mint li r’grèt k’ on-z-a dè piède
ine sacwè ki v’s-at’néve, - k’ on n’ riveûrè måy pus …