I
So l’ plèce dès dj’vås v’la dès-annêyes,
On toûrnikèt s’ vèyéve d’å lon : 
Sès cwates barkètes totes rapèç’têyes, 
Lès tièsses dès dj’vås n’ l’èstît nin mons. 
Mins d’aler d’ssus on trèfiléve ,
On n’èsteût co djamåy nåhi ; 
Toûr a toûr, ritche ou pôve voléve 
Fé raws´ so lès dj’vås d’a Bôfi.  

II 
I m’ sonle co l’ vèy avou s’bonète 
Cwand tot èsteût bin r’pondou bleû, 
Prinde ine pènêye, tot fant ’ne clignète, 
Èt tchoûkî l’ bwès d’ tos sès pus reûs. 
Tot loukant toûrner s’ caval’rèye, 
Cwantes fèyes ni nos-a-t-i nin dit : 
« Èfants, ki n’ polez-v’ tote vosse vèye 
Fé raws´ so lès dj’vås d’a Bôfi. » 

 III
È ç’ timps-la, c’èsteût l’ bone vèye môde 
Dè vèy sins malice ni fîrté 
So l’ toûrnikèt valèt, crapôde, 
Tot come dès bossous s’amûzer. 
Oûy totes nos djônès dam’zulètes
Sogne dè gåter leûs cous d’ Paris, 
F’rît l’ mowe, tot loukant lès barkètes 
Hèrtchèyes par lès dj’vås d’a Bôfi.   

IV 
Kibin ’nn’ a-t-i nin po l’ djoû d’oûy 
Å timps passé cwand i r’ tûzèt, 
Qui r’vèyèt co divant leûs-oûy 
L’åbion dè pôve vî toûrnikèt ? 
Come leû coûr deût bate di sov’nances ! 
Portant dji wadj’reû ki leûs fis 
N’ vôrît pus seûl’mint fé lès cwanses 
D’ fé raws´ so lès dj’vås d’a Bôfi.  

V 
Asteûre, li grandeûr monte lès tièsses,
Divant d’èsse djône, on vout-èsse vî, 
On coûrt lès bals, on rôle lès fièsses ; 
Lès treûs cwårts dès djeûs sont roûvîs. 
Wice dîreût-on k’i sont-st-èvôye ? 
Nos n’ lès r’veûrans måy pus riv’ni : 
Nos p’tits-èfants n’åront nin l’ djôye 
D’ fé raws´ so lès dj’vås d’a Bôfi.